حسني : الاجتماع خلص

فى البداية حاول صفوت الشريف (أمين عام الحزب الوطنى ورئيس مجلس الشورى) وحبيبالعادلى (وزير الداخلية المصرى) التهوين من يوم الغضب (25 يناير 2011) فى مكالمة مع الرئيس حسنى مبارك، ولكن ما أن إتسعت رقعة المظاهرات حتى طالب الرئيس بعقد إجتماع فورى فى مكتبه لمراجعة الأمور.
وحضر المجتمعون الآتى أسماؤهم بالإضافة إلى الشريف والعادلى
المشير طنطاوى - وزير الدفاع
فتحى سرور – رئيس مجلس الشعب
أحمد نظيف – رئيس الوزراء
عمر سليمان – رئيس المخابرات العامة
أحمد الغيط – وزير الخارجية
(ملاحظة: متوسط عمر الذين حضروا الإجتماع تجاوز ال 75 سنة)
....
الرئيس حسنى مبارك يفتتح الجلسة:
إيه إللى بيحصل فى البلد ده يا عادلى، إنت مش قلت لى دول شوية عيال إتجمعوا من الفيس بوك وحينفضوا لوحدهم، أنا بأتشتم فى الشارع ياعادلى وإنت مش قادر تعمل حاجة
العادلى: ياأفندم جمال باشا قال لى سيب المظاهرات تمشى خليهم يعبروا عن نفسهم عشان ما تقبلش بعنف
مبارك: من إمتى إنت بتاخد أوامرك من جمال، وهو فين سى جمال دلوقت مش قلت له ياصفوت إنه يحضر الإجتماع ده، هو فينبسلامته؟
صفوت الشريف: يا أفندم أنا قلت له، وهو قال لى إنت بنته (فريده) عندها سخونية شوية ومش حيقدر ييجى!
مبارك: بالذمة ده كلام ؟ البلد حتضيع مننا وهو قاعد لى جنب مراته وبنته؟ أنا سمعت إشاعة إنه سافر لندن فى طيارة خاصة من مطار غرب القاهرة الحربى، إيه الحكاية ياطنطاوى؟ جمال سافر من غرب القاهرة؟
طنطاوى: لا يا أفندم الإستاذ جمال فعلا مع مراته وبنته، والمخابرات أكدت الكلام ده، مسألة سفره إلى لندن دى إشاعة الهدف منها زعزعة الثقة فى النظام وفى إبن النظام.
مبارك: أيوة ياعادلى حتعرف تسيطر على العيال دول ولا تحب أخللى طنطاوى ينزل لك الجيش؟
العادلى: يا أفندم الوضع تحت السيطرة، إنت بس سيادتك تدى أوامرك إننا نتعامل معاهم بالقوة اللازمة.
مبارك: إنت محتاج أوامر ياعدلى دى وظيفتك.. بس مش عاوزك تعمل لى مذابح، ممنوعإستخدام الذخيرة الحية ولا حتى الرصاص المطاطى، كفاية قنابل الدموع وخراطيم المية، والمية كويسة قوى فى الشتاء ده،الواد من دول ييجى له لطشة برد تقعده فى البيت أسبوع.
أحمد أبو الغيط: أنا إتصل بي السفير السعودى فى مصر هشام ناظر وطلب منى أبلغ سيادتك إن جدة تحت أمرك، لولا إنها غرقانة دلوقت فى شبر مية
مبارك: جدة إيه يا أبو الغيط، مش أنا إللى أهرب وأسيب مصر، أنا سبب إستقرار البلد ده لمدة 30 سنة، من غيرى كانت البلد غرقت وبقت زى السودان أو الصومال، صاحب الضربة الجوية الأولى فى حرب أكتوبر مش ممكن يهرب
(صفوت الشريف يهمس فى إذن عمر سليمان: أنا إللى طلعت عليه حكاية الضربة الجوية الأولى لما كنت ماسك الإعلام والراجل صدق)
مبارك: بتقول إيه ياصفوت لعمر سليمان وما تشركونا معاكم يا أخى
عمر سليمان: لأ ده كان بيقول لى : إحنا كلنا ضباط ومش ممكن نهرب من البلد
مبارك: وبعدين إيه حكاية الإنترنت والفيس بوك والتويتر، إحنا حنسيب البلد لشوية تلامذة يغرقوها، ما تقفولوا المخروبة الإنترنت دى يانظيف.
أحمد نظيف: يا أفندم البلد كلها تقف لو قفلنا الإنترنت، حجوزات شركات الطيران وحجوزات الفنادق والإتصالات بينا وبين كل أنحاء العالم دلوقت بتعتمد على الإنترنت مش ممكن نقفلها، وبعدين عندنا كمان الحكومة الإلكترونية حتقفل.
مبارك: حكومة إلكترونية إيه وزفت إيه، إنت مش قادر تنظف البلد وتقوللى حكومة إلكترونية،بالرغم من إن إسمك نظيف (يقهقه مبارك، ويشاركه المجتمعون فى القهقهه)
نظيف: حلوة ياريس... أنا رأئي إننا نقفل الفيس بوك وتويتر مؤقتا، ودى حتقلل كثير التواصل بين الولاد دول.
مبارك: ماشى، ياأبو الغيط إنت هيلارى كلينتون إتصلت بيك ولا إنت إتصلت بيها
أبو الغيط: أنا حاولت أتصل بيها وكل مرة مكتبها يقولوا لى فى إنها فى الحمام، الظاهر عندها إسهال
مبارك: إسهال إيه يا ابو قلب طيب، دى بتزوغ منك لغاية ما تعرف مين إللى حيكسب وبعدها تنضم للفريق الغالب، الأمريكان دول أنا عمرى ما إطمئنيت ليهم
أبو الغيط: على العموم سيادتك أدرى مننا بالأمريكان، إنت بتتعامل معاهم بقاللك 30 سنة
مبارك: قصدك إيه يا ابو الغيط بحكاية الثلاثين سنة دى إنت حتبتدى تقر علىّ ولا إيه؟
أبو الغيط (مبتسما): لا يا أفندم ربنا يديك الصحة وطولة العمر.
مبارك: إيه الأخبار يا عمر، إحنا كنا خايفين من الإخوان، لكن العيال دى كلها جت لنا منين؟
عمر سليمان: والله إحنا المخابرات بتاعتنا بتقول إن لغاية الساعة ثلاثة بعد الظهر يوم 25 يناير، الإخوان ما كنش ليهم وجود فى الشارع لأن قيادتهم أعلنت إنهم مش حيشتركوا فى المظاهرة، لكن لما قيادتهم لقت المظاهرة كبرت، على طول ركبوا الموجة ونزلوا الشارع.
(يسمع الجميع شخيرا يجئ من ناحية فتحى سرور)
مبارك: جرى إيه يا سرور إنت جاى تنام هنا ولا إيه؟ إنت فاكر نفسك فى مجلس الشعب؟ طيب ربنا ما فتحش عليك بأى كلمة، على الأقل خليك مصحصح معانا.
فتحى سرور: والله ياأفندم أنا متعود أنام من الساعة تسعة، والساعة دلوقت عدت نص الليل
مبارك: البلد بتضيع مننا يا سرور وإنت عاوز تنام، والله المدنيين دول آخر دلع وما يعرفوش يحكموا كفر الشلشلمون (مبارك لمساعده هات له يابنى كباية مية ساقعة خليه يفوق شوية)
صفوت الشريف: أنا يا أفندم أقترح إنك تجتمع مع الدكتور البرادعى، خطوة زى كده ممكن تهدى الناس، وهو له شعبية كبيرة على الفيس بوك
مبارك: حيرجع تانى يقوللى الفيس بوك، مش عاوز أسمع تانى سيرة الفيس زفت ده
عمر سليمان: أنا مع صفوت يا أفندم وبعدين أنا ممكن أمهد للإجتماع مع البرادعى.
مبارك: البرادعى حيعمل إيه، هو حد بيشوفه، ده على طول مسافر، وهو عاوز يحكم مصر من الفيس بوك. وبعدين أنا حاأقابله بمناسبة إيه.
فتحى سرور: أنا رائى إنك تعرض عليه منصب نائب رئيس الجمهورية
مبارك: والنبى ياسرور تنقطنا بسكوتك أو بشخيرك! (يقهقه مبارك ومعه الحاضرون)
فتحى سرور: لا بجد ياريس دى حتدى الناس شوية أمل ويحسوا إن خروجهم الشارع جاب نتيجة.
مبارك: إنت إيه رأيك ياعمر؟
عمر سليمان: أنا مع سرور بيه.
مبارك: وإفرض إنه رفض المنصب.
عمر سليمان: خللى دى عليا ياريس.
مبارك: طيب وحنعمل إيه يوم الجمعة بعد الصلاة؟ وخاصة لو الأخوان إستولوا على الشارع.
حبيب العادلى: أنا رأئى أنك تصلى الجمعة فى جامع الأزهر مع شيخ الأزهر وتقول كلمة للناس بعد الصلاة تهدى النفوس شوية، وتقطع الطريق على الأخوان.
مبارك: الأزهر إيه ياأخى، مش سامع الهتافات فى الشارع بتقول: "حسنى مبارك ... جدة فى إنتظارك"، عاوزنى أروح برجلى الأزهر، وبعدين أنا نفسى أروح أقعد فى شرم الشيخ بعيد عن القرف ده.
عمر سليمان: ما فيش داعى لشرم الشيخ دلوقت ياريس، الموقف حساس شوية، وضرورى نعمل حاجة نهدى النفوس شوية، الناس تعبانة.
مبارك: الناس تعبانة وأنا كمان تعبان، أنا بقالى ستين سنة بأخدم البلد دى،وييجوا فى الآخر يقولوا لى "جدة فى إنتظارك"، أنا بتاع جدة برضه.
طنطاوى: طيب ما دام إنت تعبان ما تريح شوية ياريس، وإحنا نقوم بالواجب فى غيابك.
مبارك: إنت بتقول إيه ياطنطاوى، إنت جرى لك حاجة، المظاهرات أثرت عليك ولا إيه، أنا ما ليش غير الكرسى ده أو القرافة.
عمر سليمان: ربنا يطول لنا فى عمرك ياريس، المشير طنطاوى قصده إنك تاخد أجازة قصيرة لغاية ما الأمور تهدأ.
مبارك: جرى إيه ياعمر.. إنتى عاوزنى أمشى ولا إيه؟ هو إنت وطنطاوى إتفقتوا على ّ ولا إيه؟
عمر سليمان: إيه الكلام ده ياريس، بقى دى آخرة العشرة، بس إحنا مش عاوزين البلد تقلب زى تونس، الناس فى مصر تعبانين أكثر من التوانسة كمان.
مبارك: وفيها إيه ياأخى، ما الناس فى العالم كلها تعبانة، فى أمريكا وأوروبا، وإنت يانظيف مش قادر تفهم الناس إن فيه أعنف أزمة مالية شهدهاالعالم يمكن فى تاريخه، وإننا جزء من العالم، إمال الفلوس إللى بنصرفها على الإعلام ده بتروح فين.
نظيف: يا أفندم الشبان إللى نزلوا الشارع ما بيشوفوش التليفزيون المصرى ولا بيقروا الجرايد الحكومية، دول بيدخلوا على الفضائيات والإنترنت.
مبارك: ما هو من خيبتنا بقالنا 50 سنة عندنا تليفزيون ومش عارفين نعمل قناة زى الجزيرة، قطر البلد إللى أصغر من شبين الكوم، عملت قناة عالمية فى ظرف 10 سنين. المهم دلوقت عاوزين قرارات حاسمة لأنى تعبت وعاوز أروح شرم باسرع ما يمكن.
صفوت الشريف: أنا شايف اول حاجة سيادتك ضرورى تكلم الناس فى التليفزيون.
مبارك: عاوزنى أقول لهم :"أنا فهمتكم" زى زين العابدين؟
صفوت الشريف: يعنى تكلمهم عن إنتخابات الرئاسة وعن الوظائف الجديدة ونرفع الحد الأدنى للأجور، المهم إن الناس تحس إن خروجها للشارع جاب نتيجة. وممكن تقابل البرادعى، مجرد مقابلته حتى لو ما عرضتش عليه أى منصب ممكن يهدى النفوس.
مبارك: خلاص ما عنديش مانع خلينى أكلم الناس يوم الجمعة بالليل، وربنا يسهل، والنبى يا نظيف صحى فتحى سرور قل له الإجتماع خلص