مقالات الكاتب الساخر الفاتح يوسف جبرا

عداد (دفع الهواء) المقدم

أصل الحكاية :
بدأت الحكاية بخبر صغير نشر فى إحدى الصحف ( الهامشيه ) التى تعتمد على االإثارة والخبر يقول بأن المسئولين وبعد أن إنتهوا من تركيب عدادات الدفع المقدم للمياه فأنهم بصدد تركيب عدادات (الدفع المقدم للهواء) وذلك عن طريق جهاز يثبت على أنف كل مواطن يقوم بحساب كميات الهواء التى تدخل الى رئتيه.
لم يتفاعل الموطنون مع ذلك بأعتبار أن الصحيفه تعمد إلى الإثارة وتحاول ( تخفيف دمها ) وأن الخبر لا أساس له من الصحه ولكن وبعد أقل من شهر من نشر ذلك الخبر جاء على لسان أحد المسئولين الكبار فى إحدى كبريات الصحف بأن ( هيئة هواء ولاية الخرطوم ) تدرس مشروع ( دفع الهواء المقدم ) وأن التجربه سوف تعمم بشكل أولى على سكان ولاية الخرطوم ثم بعد ذلك لبقية أنحاء البلاد . توقع الجميع أن يصاحب تصريح ذلك المسئول إستنكاراً وشجباًً وتظاهراً من المواطنين الا أن ( المسأله ) مرت مرور الكرام كما سبق أن مرت مسأله (عدادات الدفع المقدم للمياه) .
على الرغم من كل ذلك الا أن المواطنين قد إاستبعدوا ذلك تماماً أى أن يكون فى نية (الحكومه ) بيع الهواء للمواطن ، ليس لأن الحكومة (تتورع) عن فعل ذلك (لأن الحكومة لو لقت طريقة تبيع المواطن ذاتو) و لكن لأن الأمركما يراه المواطنون يستحيل تنزيله الى أرض الواقع عملياً ولم يعلم المواطنين بأن التكنولوجيا الحديثه لا تعرف المستحيل وأنه كما أن هنالك عدادات دفع مقدم للمياه فهنالك أيضاً نوع آخر للهواء .
على شاشة الفضائية السودانية جلس ثلاثة مسئولين ( المسئول هو من إنتفخت أوداجه شحماً وإزدادت بشرته لمعاناً وأشرق النور من وجهه المشع ما عدا دائرة غامقه قطرها 2 سم هى علامة الجودة )
المذيع : يسرنا أن يشرفنا اليوم فى هذا اللقاء السيد المدير العام لهيئة هواء ولاية الخرطوم والسيد مساعد المدير العام للمبيعات والسيد مساعد المدير العام للهندسة والصيانة وذلك من أجل تعريف المواطنين بمشروع عدادات الدفع المقدم للهواء (المذيع مواصلاً) :
- بداية سعادة المدير العام لهيئة هواء ولاية الخرطوم ممكن نعرف الدوافع والأسباب وراء المشروع ؟
- بسم الله الرحمن الرحيم والحمد لله رب العالمين والصلاة والسلام على أشرف خلق الله أجمعين وعلى من إتبعه بإحسان إلى يوم الدين أما بعد : والله الحقيقة المشروع دا ماجديد ونحنا بدينا فيهو من زمان وهو موجود فى (الإستراتيجية الشاملة) لكن بس قلنا أحسن أول حاجة ننتهى من قصة الكهرباء وبعدين المويه ( حتين ) نجى للهواء (يضحك) يعنى (نمزمز) بيكم شوية شوية
- يعنى ممكن نقول إنتو عاوزين تبيعوا ( الهواء ) للناس ؟
- المسأله ما مسألة بيع ... إنتو لازم تعرفوا إنو فى ناس بتستغل مسأله مجانيه الهواء دى إستغلال بشع وبتتعامل معاها بطريقه بشعه يعنى إتصور زول قاعد يشرب فى شاى مش يشرب وبس؟ لا كمان تلقاهو قاعد يتنفس .. أو تلقى واحد قاعد يتكلم فى الموبايل وكل كلمة والتانية تلقاهو (يجر) ليهو نفس….دا استغلال بشع لواحد من مصادر الحياة الهامة وهو الهواء .. هسع الزول القاعد يتكلم فى الموبايل أو الزول القاعد يشرب فى الشاى دا كان كانوا قاعدين يدفعوا قروش الهواء دى كان عملوا كده؟؟ خليك من دا .. يا أخى شوف بتاعين (البناشر) بينفخو ليهم كم لستك فى اليوم ؟ معقول دا كلو مجانى والدولة ماعندها نصيب فيهو ؟
المذيع : طيب ممكن السيد / مساعد المدير العام للهندسة والصيانة يشرح للمواطنين عمل الجهاز؟
- بسم الله الرحمن الرحيم والحمد لله رب العالمين والصلاة والسلام على أشرف خلق الله أجمعين وعلى من إتبعه بإحسـان إلى يوم الدين أما بعد (يقوم بعرض الجهاز على الشاشة .. ويواصل) ذى ماشايفين الجهاز هو عبارة عن جهاز صغير يوضع على الأنف ( ذى الكمامة) يعنى وبيخرج منو أنبوب يمر على ( عداد رقمى ) يقوم بحساب كمية الهواء المستنشقة حيث يقوم بخصمها من الرصيد ويوجد (ذى ماشايفين) لوحة مفاتيح رقمية تستخدم لإدخال ( العشرين رقم السرية ) المفروض ينزلها الزول بعد ما يشترى الكمية العاوزها من (مكتب البيع) ثم ينتهى الأنبوب (ذى ما شايفين) بفتحة يدخل منها الهواء المستنشق .
وعاوز أقوم بتنبيه الموطنين إنو يضعوا الشاشة فى مكان بارز ليسهل قراءتها من قبل المراقبين ( يقوم بوضع الكمامه على انفه وشبك الشاشه على جيبه الأيسر للقميص ثم يخاطب المشاهدين) يعنى بالشكل دا.
المذيع : طيب الحقيقه عندنا كمية من (المحادثات) لموطنين عندهم إستفسارات
-. آلو.. آلو إتفضل ... معاى منو .
- معاك (عكاشة) من الدويم
- إتفضل ياعكاشه وجه أسئلتك معاك ( هيئة هواء ولاية الخرطوم)
- السلام عليكم
- وعليكم السلام إتفضل
-والله أنا عندى سؤالين السؤال الأول : الزول لو ما إشترى الجهاز دا بيحصل ليهو شنو ؟ والحاجه التانيه هل جهاز زول ممكن يشيلو زول تانى يستخدمو؟
- والله دىأسئله وجيهة .. أول حاجه أى زول (يتمسك ) وهو ما (خاتى ) الجهاز دا (حتى لو عندو ونسى يلبسو) ح يغرم خمسين ألف جنيه لأنو الجهاز دا مفروض الزول يكون (مركبو ) وما يطلعوا لحدى مايموت والحاجة التانية أى زول يطلع الجهاز بعدها ما نركبوا ليهو نحن بنعرفوا طوالى لأنو الاجهزة دى (موصله) لاسلكياً عن طريق (الموبايل) مع كمبيوتر (هيئة هواء ولاية الخرطوم) وفى الحاله دى ح يغرم الشخص غرامه باهظه .
المذيع : أفتكر كان عندو سؤال تانى
- أيوه .. أما فيما يختص بأنو زول يستخدم جهاز الزول التانى فدا ما ممكن لسببين السبب الأول إنو لو فى زول إستخدم جهاز زول تانى معناها الزول التانى دا ح يضطر يطلع الجهاز بتاعو وبى كدا (الكمبيوتر) ح يعرفوا لينا ذى ماسبق وقلنا ... الشئ التانى إنو الزول لمن يمشى يشترى جهاز عداد الهواء المقدم هنالك لجنه طبية بتخضعو لفحص عشان تحدد إستهلاكو من الأوكسجين ويتم على هذا الأساس (تشفير) الجهاز بتاعو عشان يسمح بمرور كمية (الهواء) بتاعتو بس .. يعنى ببساطة الجهاز بس معمول للزول الإشتراهو.
- معانا محادثه تانى – آلو.. معانا منو ؟
- معاكم (إنعام) من الكدرو
- إتفضلى يا انعام ( هيئة هواء ولاية الخرطوم) معاك
- السلام عليكم
- وعليكم السلام
- والله فى الحقيقة أنا عاوزه أعرف العدادات دى مقاسات يعنى ؟؟؟ والا كلها مقاس واحد ؟؟؟
- شكراً على السؤال ... لا العدادات دى مقاسات على حسب حجم رئة كل مواطن وعندنا خمس مقاسات Small – Medium – Large – X-Large – XX-Large
- آلو .. آلو معليش نسيت قول ليكم (حبوبتى) عندها (ازمه) بتقوم عليها طوالى أها فى الحاله دى نطلع ليها الجهاز عشان نركب ليها جهاز (الأزمة)؟
- ( يضحك فى خبث) .. لا مافى داعى لانو نحنا عملنا حسابنا للمسألة دى – تقومى توصيلى ليها نهاية ( الأنبوب) بتاع الجهاز بنهاية الأنبوب بتاع جهاز الأزمه وبس .
- آلو محادثه ( تانيه) .... معانا منو ؟
- معاك (صابر ) من أبو سعد
- مرحب ( صابر) سؤالك شنو ؟
- أنا عاوز اسأل بس عن (وحدات البيع ) ح تكون شنو ؟ والتسعيره كمان كيف؟
- شكراً صابر .. وحدة البيع هى الرطل / هواء ومسألة التسعيرة دى أنحنا رأينا إنو الهواء يكون فى متناول الجميع يعنى كل شرائح المجتمع على الرغم من إنو الدولة السنة الفاتت دى بس داعماهو بسبعمية مليون دولار ... لسع يا (صابر) ما إتحدد سعر الرطل كم لكن يا (صابر) تأكد تماماً انو ح يكون معقول .
المذيع : ناخد آخر سؤال .. معانا منو ؟
- معاك ( كباشى ) من الدروشاب
- اتفضل ياكباشى
- والله الحقيقة هو ما سؤال أنا عاوز أقول إنو الحديث الشريف بيقول الناس شركاء فى الكلأ والماء والنار (يعنى الكهرباء هسع) إنتو عملتو (جمره) للنار يعنى الكهرباء وجمره للموية وهسع كمان عملتو جمره للهواء ... معقوله بس وين ( الدين) بتاعكم ؟
- أول حاجه يبدو إنو الاخ كباشى منفعل شويه وما عارف تفسير الحديث ... نحن عشان الحديث ذاتو وعشان الناس شركاء فى الحاجات المهمه دى عملنا ليها جمره عشان مامعقول زول يقعد يرش قدام بيتو (ميتين) صفيحة مويه وزول تانى مالاقى يشرب .... وزول مناخيرو كبار ذى
( الليله وبكره) يشفط الهواء كلو وما يخلى ليهو ( نفس) للزول التانى ... يا أخ كباشى (الجمره) للترشيد عشان الناس يكونوا شركاء فعلاً فى الحاجات المهمة دى والمسألة ما تكون (مطلوقة) ساكت .
- (وجه المذيع يملأ الشاشة) أعزائى المشاهدين نكتفى بهذه المداخلات فى هذه الحلقة التنويرية والتى إستضفنا فيها كبار المسئولين ( بهيئة هواء ولاية الخرطوم) وموعدنا معكم فى حلقة أخرى يوم الجمعة القادم نتحدث فيها عن التداعيات الاجتماعية والاقتصادية والسياسية التى سوف يفرزها هذا المشروع .. إلى اللقاء .
(لم تبث حلقة الجمعة والتى كان من المفترض أن تناقش التداعيات والآثار المترتبة على قيام المشروع وذلك بسبب سفر المسئولين الذين تمت إستضافتهم فى البرنامج
إلى اليابان لحضور الورشة العلمية التى ينظمها الإتخاد العالمى لمصنعى (الجمرات) والتى بعنوان – وماذا بعد جمرة الهواء- ) لذلك فسوف أقوم بتخمين بعض أنواع التداعيات –
تداعيات إجتماعية (1) :
لأن عداد الهواء المقدم يوضع على الصدر وكل الناس (شايفاهو) فقد أصبحت مكانتك الإجتماعية ووضعك المالى تحدده كمية الهواء المجودة فى العداد والتى يحددها رصيدك ، فهذا هو (عادل) يخاطب أفراد أسرته وهم متوجهين لطلب يد زميلته (هاله) من أسرتها :
- معقول هسع يا بوي نمشى للناس ديل و(جمراتنا) دى كلها لو جمعوها ما تعمل ليها هواء بى عشرين ألف ؟
- أها وانت عاوزنا نعمل شنو ؟
- والله حقو الناس الماشين ديل كل واحد منهم نملأ ليهو هواء بى خمسين ألف
- إنت يا ود (مطرطش) ونجيب ليهم قروش من وين ؟
- ما مشكلة أنا شلت ليا مرابخة من البنك
بينما كان (عادل) يقوم بانزال أرقام ( الجمره الهوائيه) لأفراد أسرته والذاهبين معه لطلب زميلته (هاله) كانت أسرة هاله (رقيقة الحال) يدور بين أفرادها الحوار التالى.
هاله: هسع يا أبوى ناس عادل ديل معقوله يجو ويشوفوا(شاشتك) (مصفره) كدا وما فيها هواء بى خمسه ألف ؟
أبو هاله : وعاوزانى أعمل شنو يعنى؟ البيت مافيهو ولا مليم عملتوها ليا كلها جاتوهات وبرتكان وتفاح وماكنتوش
وهنا نط) حماده شقيق هاله الصغير قائلاً :
- أنا عندى ليكم فكره يا ابوى أيه رايكم (أظلل) ليكم شاشاتكم دى كلها وزول يشوف عامله كم مافى ... وبعد ما يطلعوا نشيل التظليل.
تداعيات إجتماعية (2) :
- يا أبو محمد .. عاوزه ليا مية الف
- تعملى بيها شنو ياوليه إنتى قايله عندى خزنه .
- انا ما كلمتك من امبارح قلت ليك ماشه ( أعزى ) ناس (فوزيه) ديل .
- وما تمشى تعزيهم أنا ما سكك ..
- أمشى أعزيهم والناس كلها تشوف جمرتى التعبانه دى .. والله بكاء ناس (عزيزة) الفات داك (فوزيه) دى جات ماليه ليها (هواء) بى تسعمائة الف وخاته الجمره فوق صدرها ذى البرواز وتتقدل ..
تداعيات رياضية :
أفرز مشروع (جمرةالهواء) بعض الوظائف التى لم تكن موجودة مثل وظيفة (مراقب جمرة لاعبين) وهو مسئول عن مراقبة (جمره) اللاعبين عند ادائهم للمباريات والتأكد من ان كل لاعب لديه رصيد يكفيه لاداء المباراة.
بعد أن إنهزم فريق ( الصقور) من فريق( الثعالب ) ألقى فريق (الصقور) باللائمة على مراقب جمرات اللاعبين .
- والله لو ما اللاعب الجديد ( حسن كدايس) ده جمرتو انتهت والمدرب طلعو من الماتش كان هسع دخل ليهو قون قونين
- دى كلها مسؤليتك يا (مراقب الجمرات )
- ياجماعة والله أنا قبل الماتش شفت جمرتو لقيت عندو هواء ينفخ ليهو (منضاد) نعمل ليهو شنو؟ ده بيجرى ذى ( الطيارة) كمل ليهو 500 رطل هواء كيف ماعارف .. انتو سجلتو ليكم لاعب ولا ( شفاطه)..
تداعيات فنية :
بعد اداء الفنان ( عماد سخانه ) لوصلته الغنائية فى برنامج تلفزيونى على الهواء ( بث مباشر) فوجىء المشاهدون بعازف الساكسفون ( كوكو تيه ) وهو يهرول نحو مايسترو الفرقة :
- والله ياخ الشغل ده معانا بالخساره
- كيف يا كوكو؟
- كيف شنو ؟ أنا قبل ما أجى الأستديو دا مالى ليا هواء (بخمسين الف ) هسع ثلاثه أغنيات بس رصيدى كمل .. دى ماشغلانه لازم تعملوا لينا (علاوة بدل هواء) عشان نعزف تانى معاكم .
تداعيات قانونية :
القاضى – وإنت عرفت المرحوم دا مات كيف ؟
الشاهد – دى عاوزه ليها (عرفه) يامولانا؟ عاينت لى (جمرتو) لقيتها ما بتنقص وقاعدة فى حتتها ؟ عرفت طوالي إنو نفسو قاطع وبقى (أسماء فى حياتنا).
تداعيات طبية :
- ده دكتور شنو شابكنى ليك شيل نفس ... شيل نفس .. شيل نفس لحدى ما كمل جمرتى كلها .. هسع الزول القروش دى يشترى بيها الأدويه الفى (الروشته) والا يشترى بيها (جمره هواء)؟؟؟؟
تداعيات تعليمية :
إقرأ التنبيهات التالية قبل أن تجيب على اسئلة الامتحان
1/ تأكد من إستخدامك لقلم الحبر الجاف
2/ تأكد من الاجابة على جميع الاسئلة ووضع رقم السؤال فى المكان المحدد
3/ لا تكتب على الهوامش
4/ تاكد من أن (جمره الهواء) لديك تكفيك طيلة زمن الإمتحان ا
تحويل رصيد :
بعد أن تلقت (هيئة هواء ولاية الخرطوم ) عدة شكاوى من المواطنين تتحدث عن مشكلة انتهاء (جمره الهواء) فى أوقات متاخره من الليل أو فى أماكن بعيده عن مكاتب بيع الجمره قامت الهيئه بحل المشكله تسهيلاً (للمواطن الكريم ) وذلك عن طريق خدمة تحويل الرصيد من عداد شخص إلى عداد شخص آخر والتى وكما تم الاعلان عنها فى الصحف اليومية تتم كالاتى:
* رقم عداد الشخص المحول # الرصيد المحول بالرطل هواء * رقم عداد الشخص المحول اليه.
بعد أن شاهدت (علوية) المسلسل العربى دخلت إلى مطبخها لتوقد (المبخر) كالعادة لخرق (البخرة) التى أعطاها لها (الفكى أب عصاية) لتطليق ضرتها (التومة) وما أن وضعت المبخر ونفخت فى الجمرة حتى صاحت :
- ( سجم رمادى) جمرتى ماخلاص قربت تكمل ... (وبعد تفكير) كدى النضرب لى (عزيزة) دى تحول ليا رصيد .. (تتناول الموبايل وتتصل ) :
- عليك الله ياعزيزه بلقى ليا رطل رصيد هواء عندك تحويلهم ليا لى عشان رصيد ى قرب ينتهى والواطه إتاخرت والجمرة قفلت؟.
- وحات الله يا علوية ما طالبانى حليفه هسع رسلت (الهواء بتاعى) كلو لى (أمونه ) قالت جات ليها من (سمايه) مهدوده وجمرتا مصفره والله رسلتو ليها وما فضلت لى روحى غير رطلين هواء يقعدونى للصباخ .
تداعيات دينية :
- ألو .. آلو .. برنامج فتاوى على الهواء؟
- أيوه .. إتفضل .. معانا منو؟
- معاك (حسن عمرين) من المسالمة
- إتفضل يا حسن .. سؤالك شنو؟
- والله انا بس بسأل لو الواحد ماشى المسجد يصلى قام عاين لى جمرتو لقاها خلاص قربت تكمل (يعنى كم نفس كدا وتقطع) السؤال بتاعى هل الزول يواصل ويمشى يصلى والا يمشى يشترى ليهو جمرة ؟
- أكيد يواصل يمشى يصلى
- أها وبعدين البدفع ليهو الغرامة (للحكومه) منو؟؟
وهنا قام (مولانا ) بإستقبال محادثة جديده !!!!

سيناريوهات - (زولنا ذاتو!!)

بينما كانت العربه المرسديس السوداء المظلله تنطلق فى شارع المطار وهى تقل (سعادتو) المتوجه للحاق الطائره المغادره الى (لندن )فى مهمة رسميه تحركت عربة (النفايات) التى كانت على جانب الشارع الشئ الذى جعل سائق عربة (سعادتو) يفقد السيطره على قيادة العربه وينحرف ليصطدم باحد اعمدة الكهرباء .
هرع من كانوا متواجدين حول المكان من الجمهور وقاموا بكسر زجاج السياره و اخراج السائق و(سعادتو) الذين الذى كان فى حالة اغماء كامله.
ثم نقل (سعادتو) الى المستوصف القريب من شارع المطار فى سرعة تم إدخاله إلى المستوصف ثم وضعه على الطاوله الوحيده فى غرفة العمليات حيث تمت اضاءة انوار الغرفة الكاشفه.. فتح (سعادتو) عينيه فى صعوبة بالغة فرأى شخص يقف عند راسه مباشرة يرتدى بالطو ابيض وطاقيه بيضاء ثم نظر ناحية رجليه فرأى آخر بنفس الملامح يرتدى ذات الزى .
- ياجماعه انتو منو؟ دكاترة
- لا.. الدكاتره ماقدروا يعملوا ليك حاجه.
- طيب وانتو منو ؟؟ مستشارين طبيين؟
- لا ..انت الطب ما قدر يعمل ليك حاجه ..وايامك فى الحياة انتهت وجيتنا هنا
- (فى استغراب) طيب انتو منو ؟
أجابه الذى يقف عند رأسه انا (ملك الحسنات)والهناك داك (ملك السيئات)
- (وعينيه متسعتان من الخوف الدهشة) : وانا هسع يعنى مت وكده ؟
- وشبعت موت كمان
- إنتو بى صحكم ؟؟ يعنى هسع فارقنا (نعيم الدنيا) داك كلو والكندشة والمواتر والأطايب ؟؟
- (فى حزم) نعم .. أنت فارقت الدنيا
- اها وانا هسع طيب هنا ليه؟
- هنا الحساب
- حساب شنو والله انا(الحساب) دا من أيام المدرسة ما شاطر فيهو وما بدورو كلو كلو
- ما بتدورو شنو هو انحنا قالوا ليك عاوزين نديك (مسائل) .
- امال ماشين تدونى شنو ؟
- ماشين نحاسبك ..
- (فى تهكم) تحاسبوني .. والله حكاية انا اشغلت وزير .. ووالي .. ورئيس مجلس ادارة لاربعمية شركة زول حاسبنى مافى.. تجوا انتو ديل (يؤ شر عليهم فى إستهزاء) تحاسبونى ؟
- وزير ... والى ... مدير ... رئيس مجلس إدارة ... ده كلو كان هناك فى الدنيا .. هنا فى اعمالك وبس..
تسطع فى المكان اضاءه شديده ... سعادتو (مسجى) على مسطبه على شكل قبر عليها شواهد يلبس (كفنا ) ابيض ناصع وعلى راسه (ملك الحسنات)وعلى رجليه (ملك السيئات) .. فى اتجاه نظر (سعادتو) هناك شاشه عرض كبيره تحتها ميزان ضخم .
- شايف الميزان دا ..... دا ميزان اعمالك..
- (يعاين وهو يضع يده على جبهته من شده الاضاءه ) : ده كلوا ميزان ؟
- نعم ... وهو ميزان اعمالك العملتها كلها فى الدنيا خيرها وشرها
- والكف المايله لى تحت شديد ديك شنو؟؟ الكفة المردومه فيها الكتب الكثيره ديك..
- للاسف دى كفه سيئاتك...
- (فى اندهاش) : ودى كلها سيئات...(ثم مواصلاً) طيب واصلى انا فى الدنيا دى ما عملت أيتها حسنه؟
- عملت حسنات
- (فى فرح ) أها طيب وينا؟؟ كاتبنها وين؟؟
يذهب (ملك الحسنات) فى خطوات منتظمه الى حيث الميزان ويدخل يده فى كفة (الحسنات) حيث يجد نوته صغيره كنوته الجيب التى تستخدم لحفظ أرقام التلفونات.. يقوم باحضارها ثم يخاطب (سعادتو) قائلا:
-النوته دى فيها حسناتك؟
- (فى إستنكار) حسناتى فى الدنيا كلها فى النوته الصغيره دى؟؟
- نعم
- (فى ثقه متناهيه وحزم) : لا...لا اكيد انتو تكونوا غلطانين
- (فى جدية) هنا مافيش غلط
- ما فيش غلط كيف يا جماعه...سبحان من لا يخطئ..
- عشان جرستكم دى نحنا جبنا الشاشه الكبيره ديك...ممكن نعرض ليك فيها حياتك مما ابوك اتزوج امك ..ولحدت ما مت ..كل ثانيه فى حياتك مسجله عندنا
- (مخاطباً نفسه فى خوف) : لاحولتن ولا قوتن الا بالله ..دى هسع الزول يطلع منها كيف ؟؟
- (فى صوت آمر) : عاوز تعرف هسع حسناتك فى الاول والا سيئاتك؟؟
- لا.. ادونى حسناتى اول.. أنا عاوز حسناتى
- (ملك الحسنات يفتح النوته الصغيره ينظر فيها ثم يخاطبه :
- والله إنتو حيرتونا ذاتنا ؟
- (فى خوف وتوجس) : حيرناكم فى شنو كمان يا جماعة ؟؟
- تعرف إنت أول زول يجينا هنا عندو (حسنه) مكتوبه لكن فى شكل سيئة !!
- (متسائلاً فى شوية لماضة) : ودى كيف افهمها ؟ بس دى تكون كيف (حسنه) فى شكل (سيئة) دى ؟؟
- عاوز تفهمها ؟.. طيب نشغل ليك الشريط تشوفها بى عينيك
إنطفأت أنوار المكان .. عم الظلام .. الشاشة تضئ ... الدنيا صبيحة احد الايام ..(سعادتو ) جالس فى مكتبه ...على جهاز( الانتركوم ) تخاطبه السكرتيره:-
- يا سعادتك فى واحد قريبك اسمو (التجانى )قال عاوز يقابلك
- خليهو يدخل
بعد السلام والتحيه خاطب ( التجانى ) سعادتو قائلا :
- تعرف ياسعادتو والله انا جاييك وواقع ليك فوق كرعينك ومزنوق زنقه شديده وذى ما انت عارف الاولاد والجامعات والمدارس والمصاريف وايجار البيت وشنو وشنو. ... وقبل أن ينتهى (التجانى) من عرضحاله وعلى جهاز الانتركوم كانت السكرتيره تخاطب سعادتو:
- يا سعادتو الناس المقدمين لعطاء(الهنايات) قالوا عاوزين يقابلوك
- خليهم يدخلو
- السلام عليكم .
- وعليكم السلام ورحمة الله تعالى وبركاته
- اها يا (سعادتو) العطاء وقع لمنو؟
لدهشة (التجانى) فقد قام ســعادتو وفى حـزم وجدية وعلى طول مشيراً إليه وهو يقول لهم:
- العطاء وقع للزول دا ..اطلعوا بره اتفاهموا معاهو وادوهو الفيها النصيب عشان يتنازل ليكم
يخرج (التجانى) ومعهة الجماعه ثم يعودون بعد دقائق وهو يحمل فى يده كيس به مبالغ نقدية وأحد (الجماعة) يخاطب سعادتو :
- اها اديناهو خمسين مليون واتنازل ... نجى نمضى العقد متين؟؟
- أمشوا خلاص بكرة الشئون القانونية بتلقوهو جاهز
وبعد ان خرجوا (الجماعه) وضع (التجانى) القروش على مكتب سعادتو ... قام سعاتو بسحب (القروش) لدرج مكتبه المفتوح وقام باعطاء (التجانى ) مليونين قائلا :-
- دى مش بتحل ليك المشكله بتاعتك ؟؟
- كيف ما تحلها بتحل ابوها ..شكرا.. شكرا سعادتك ... جزاك الله كل خير.......
قام( ملك الحسنات)بايقاف الشريط وهو يخاطب (سعاتو)قائلا:-
- ده انت والا ما انت ...
- (فى صوت خائف مرتعش) : الله لا كسبكم دى صورتوها كيف....
ثم واصل (ملك الحسنات) حديثه لسعادتو : هسه دي حسبناها ليك حسنة .. مع انها جاية من سيئة ..
- طيب كان كده أنا ذى دى ما عندى كتير .. ذى الحسنات الجاية من سيئات دى .. كلها حسبتوها ليا؟ هسع كان حسبتوها ليا كان كان حسناتى بتكون شوية كده ..(ثم فى هيجان وجدية) انا اعترض .. انا عاوز اقدم استجواب ..
- استجواب ده هناك فى( البرلمان) هنا تسمع وتتحاسب وتشوف وبس .
-(سعادتو فى إستسلام ) طيب خلاص يا جماعه ورونى باقى حسناتى .
- نقولا ليك ولا نوريك ليها على الشاشه
-لا..لا... خلاص ما عاوزين شاشه ... ما عاوزين شاشه ..انا اعصابى بايظه وما قادر اشوف
- (ملك الحسنات مواصلاً) طيب من حسناتك انك ما كنت بترد على الناس القاعدين يتهموك فى الجرايد بانك (حرامى) ومرتشى وفاسد....
- ارد عليهم كيف ديل مارقين وماجورين وطابور خامس(وكمن اكتشف شيئا) وكمان اقول ليكم حاجه .. ديل( اعداء الدين) ...وحقو تجيبوهم تحاسبوهم ..
- الدين ده خليهوا هسع ح نجيهوا بعدين لكن عدم ردك على الاتهامات ده نحن ختيناهوا ليك فى ميزان الحسنات باعتبار انك لم تواجه السيئه بمثلها مع انوا نحن عارفين انك ما كان فى امكانك ترد عليهم عشان ما تورط نفسك وتدخلا فى متاهات
- اها باقى حسناتى وين ..صلاتى وين وصيامى وين .. وحجيت سبعتاشر حجه مشو وين ؟
- اول حاجه السبعتاشر حجه الحجيتم ديل ما حسبناهم لانو انت حجيتم( بقروش الحكومه) يعنى بقروش (المواطنين) تانى حاجه فى رمضان كنت بتتعمد تسافر تمشى (الدول) البارده المرطبه وتهرب من( الحر والسخانه)... (ثم منتهرا) انت عاوز تشوف بتصوم وين وكيف
تنطفئ أنوار المكان .. يعم الظلام .. الشاشة تضئ .....على (الشاشه) سعادتو يجلس على كرسى خيزران على أحد الشواطئ (الشتويه) وهو يرتدى (بالطو) ويضع (شالاً) حول رقبته مرتدياً نظارة سوداء وقطع الجليد اليضاء تتناثر هنا وهنالك وحوله أفراد عائلته
- آآى دا أنا لكن ما كان رمضان .. هسع البورى إنو دا كان فى رمضان شنو ؟؟
- هنا مافى كذب وغش الكذب والغش والتزوير والتلفيق ده عندكم هناك ... فى الدنيا
- (فلى تحدى مصطنع) أها وصلاتى كمان دى فيها شك .. أنتو ماشايفين (الغره) الفى جبهتى دى ؟
- إن إن صلاتك لم تنهاك عن الفحشاء والمنكر لذلك فهى ليس لك فيها حسنات
- أها طيب (والغره) دى (البدعك) فيها كم سنه دى لمن جبهتى ورمت دى راحت ساكت ؟ ما عليها درجات !! و كده!!
- هنا يقوم (ملك الحسنات) بقفل (نوته الحسنات) ويخاطب (سعادتو) قائلاً :
- كده حسناتك إنتهت ...
_ (فى ضعف وإستجداء) إنتهت كيف ؟؟ معقول ياجماعه؟؟ أكيد غلطانين
- (فى حسم) : ماقلنا ليك هنا مافى غلط
يخطو (ملك الحسنات) نحو الميزان مره أخرى ويضع (نوته الحسنات) فى كفتها مره أخرى ويعود .. حيث يتحرك (ملك السيئات) نحو الميزان بنفس الإيقاع المنتظم .. يقوم يحمل أحد (المجلدات) الضخمه ويعود الى مكانه .. ويخاطب سعادتو:
- كل مجلد من مجلدات السيئات الستة ديل فيهو سيئات عشرة سنين .. وده (مجلد) سيئاتك للعشرة سنين الأخيرة
(فى إستعلاء) : وهسع عاوزين (تقروهن) ليا كلهن ؟ قالو ليكم أنا فاضى ليكم أنا عندى إجتماع ...وكمان محصل ليا سفرية .. أنا ..
- أجتماع وسفريات دا هناك فى الدنيا .. هنا حساب .. ميزان
(سعادتو يتحسس جسده .. يقرص خده .. يقوم بعض أصابع يده ثم يقول) :
- ياربى أنا فى حلم ولا فى علم
- فى علم ... وعشان تتأكد نوريك طفولتك
إنطفأت أنوار المكان .. عم الظلام .. الشاشة تضئ .... منزل جالوص متهالك مكون من غرفتين و(تكل) و(أدبخانه) .. .. (كر جداد) خشب متصدع به (جداتين وديك) ... أطفال صغار يرتدون سراويل (دموريه) متسخة يلعبون بكرة (شراب) أكثر إتساخاً
_- يااولاد ماتمشو المدرسه وتخلوا لعب (الكوره) دى ... (الطفل سعاتو) يمسح (ريالتو) و(يقش) (مخاخيتو ) بطرف قميصه المتسخ المكرفس ثم يتناول شنطة الدبلان (يعلقها على كتفه) ويخرج صوب المدرسه ...
- المعلم يوقف (الطفل سعاتو) ويساله :
- إنت يوم واحد يا مبهدل ما تحضر الطابور ؟؟ (ثم والشرر يتطاير من عينيه) إتنين فى إتنين بيساووا كم ؟؟
- يصمت الطفل (سعادتو) ويحدق فى وجه المعلم فى (بلاهه) بينما المعلم ينهال عليه بسوط يحمله .. وهو يقول معقول في سنه رابعه وما عارف ليا إتنين فى إتنين بيساووا كم ؟؟
يضئ المكان وتتوقف شاشة العرض ثم يخاطب (ملك السيئات) سعادتو :
- كفايه ولانواصل
- أنتو كدى ياجماعه ما تباركوها شويه .. ونتفاهم .. يدخل يدو فى جيبه ويخرج (حزمة دولارات) -ثم مواصلا- والله أنا عارفا شويه لكن دى النثريه الكنت ماشى بيها السفرية قبل الحادث !!
- (فى صرامة) أساليبك دى الكنتا بتعملا فى الدنيا دى هنا ما بتمش هنا دار محاسبه وليست دار (مفاهمات) أو رشوات .. لم قروشك عليك
_ طيب هسع أنتو جبتونى فى المدرسه وجبتو ليا بيتنا المكسر دا .. يعنى شنو ؟
سكوت تم إنطفأت أنوار المكان .. عم الظلام .. الشاشة تضئ ... سعادتو يدخل من عربته (الرسميه الفاخره) ...فى أحدى شوارع الخرطوم الجديده .. يقف (سعادتو) أمام إحدى العمارات الفارهات ذات الست طوابق .. ثم يخاطب المهندسين المنهمكين فى العمل :
- نزلتو ( السراميك ) من الكونتينرات؟ (ثم مواصلاً) وحاجات التكييف المركزى طلعتوها من (الكراتين)؟
- نزلناهم ... بالمناسبة جاء المقاول وما لقاك وقال ليك خلى ليهو الشيك أبو ثلثمائه مليون نقدم المبلغ المتفق عليه للتشطيب .
(الشاشه تنطفئ)..
- (سعادتو فى زعل) ياجماعة انتو قاصدنى ولآ شنو ؟
- هنا مافى زول بتقصدو .. هنا (اعمالك ) هى الفيصل ..
- طيب وفيها شنو لمن ابنى ليا بيت بى مليارين ثلاثه؟
- بيتك دا مكلف 2مليار و900 مليون واربعمائة ألف وثلثمائة وعشرون جنيه (ثم مواصلاً) إنت ما اشتغلت غير موظف دولة تقدر تورينا جبت القروش دى من وين؟
- ورثتها .. ورثتها..(ثم يتذكر شريط بيت الجالوص) لا.. لا (ما ورثتها .. ما ورثتها دى من مرتبى ..أيوه من مرتبى
- تعرف لو مرتبك دا ما بتصرف منو ولا مليم انت عاوز ليك عشرة ألف وميتين واحد وخمسين سنة عشان تعمل القروش دى!
- خلاص طيب شيلوا البيت دا ما دايرو
- لكن المشكلة ما البيت
- المشكلة طيب شنو ياجماعة حيرتونى ؟
- المشكلة انو المليارات دى كانت ممكن (الدولة ) تشترى بيها أدوية تنقذ بيها مئات الأرواح الماتت من غير ما تجد علاج ..
- (فى هلع وخوف) وديل كلهم روحهم فى رقبتى .
- طبعا... طبعاً.. (ثم مواصلاً) أنا اقول ليك حاجة .. الناس الماتت بى سببك ديل كلهم ماتو قبل يومهم .. لينا (سبعتاشر سنه) كل يوم يجونا مية ميتين نفر نفتش اسماميهم فى قائمة الجايين عندنا نلقاهم مافى ، نعرف انهم ماتو (قبل يومهم) .
- لا .. لا ياجماعة أنا قلت (مرتبى) ساكت كنت اقصد إنى اقول ليكم البيت دا عملتو من (البيزنس) انتو ما عارفين انى بحب (البيزنس) ؟؟ والله انا من عمرى سبعة سنين كنت قاعد اعمل ليا (طبلية) وامشى (الطوخى) اجيب (شختك بختك) والحلاوة والبلى .. واقوم اشترى (البيض) الفى الحلة كلو (احتكرو) وبعدين ابيعو بالزيادة..
- (البيض) دا جاينو ما تستعجل ..
- بيض شنو الجايين ليهو هسع؟ (البيض) دا ما قلت ليكم كان زمان ،
- مزارع الدواجن الفى (يحرى) دى مش بتاعتك ..؟
- والله يا جماعة النصيحة .. النصيحة أنا مشارك فيها ..أصلى بحب المشاركة مما كنت صغير..
- إنت مشارك فيها بمليار وثلاثمئة اربعه وعشرين مليون ودى كانت ممكن تنقذ ليها خمسمية أربعة وثلاثين ألف وستمئة شخص..
- (فى إستنكار) ليه أصلو عندهم شنو؟؟ نزله؟؟ عايزين تكترو ليا الكوم ليه؟ ما ممكن يكونوا خمسين زول عاوزين (زراعة كلى)..
- شطارتك دى خليها فى الدنيا ..دا الواقع هناك كان كده ... فى الوقت داك القروش دى كانت بتنقذ العدد ده .
- (فى خوف) لكن هسع الناس الارواحهم فى رقبتى ديل ما بقو كتار !!
- (فى تهديد) ممكن هسع تورينا تانى مشارك وين وفى شنو والا نشغل ليك (الشاشة) ؟
- لا ما تشغلوا ليا الشاشة ..ح اقول ليكم .. مشارك ليا فى كم مصنع كده وشوية شركات وحبت مزارع وحاجات ذى دى..
- (ينظر الملك فى مجلد السيئات) هنا عندك سيئات وزنها أخف شويه.
- طيب يا جماعة وكت فى حاجات (خفيفة) ليه (كاربنى) بالحاجات الثقبلة دى؟ طيب خفيفه ذى شنو يعنى؟
- انت قمت بتعيين وايجاد وظائف لميتين واحد وعشرين شخص
- ودى فيها شنو ياجماعة ما قاعد أساعد فى حل مشكلة البطاله..
- البطالة دى ما تحلها الا باهلك واقاربك؟؟ انت كده منعت عائلات كثيرة من الوظائف دى لأنو هم كانوا أحق بيها وأهلك ديل ما مؤهلين وما دخلو فى منافسات عشان يفوزوا بيها
- هسع يا جماعة ورونى كدى وزن السيئات بتاعتى قدر شنو ؟
- ح تشوفها فى الميزان
- شنو يا جماعة لسع ما أنتهيتو من حسابى؟؟
- دى بس تسعة ورقات من (المجلد)الاول وفضل ليك باقى (المجلد) دا وخمسة مجلدات ثانى.
- لكن ياجماعة أنا كده ما بتعطل ؟؟
_احسن ليك تتعطل من (الراجيك)
- والراجينى شنو؟
تنطفئ الأنوار ... تنخفض الإضاءة... أصوات جهيرة ... الحساب الحساب يا ثواب ياعقاب ... الحساب الحساب يا ثواب ياعقاب... الحساب الحساب يا ثواب ياعقاب تنفتح ستارة تشتعل من خلفها نار حامية ذات لهب احال المكان إلى جحيم .. فى منتصفها عمود حديدى (عشره بوصة) محمر من من شدة النار.. يقوم ملك السيئات بحمله ثم يوجهه إلى (قفا) سعادتو الذى يحاول ان يبعده العمود من (قفاه) بيده وهويصرخ صرخه مدوية ارتجفت لها ارجاء (المستوصف) الخاص وهو يقول لا..لا..لا
قيل أنه أن (سعادتو) ومنذ تلك اللحظة وهو مرة مرة لا شعورياً تجده وهو(ينش) بيده على (قفاه) فى (خلعة) وهو يقول ..لا..لا..
عزيزى القارئ : إذا رأيت مسئولاً ما وهو يهش على (قفاه) بهذه الكيفية فأعلم إنو دا هو (زولنا ذاتو)