همس القوافى

موضوع: رد: همس القوافى 10/9/2008, 3:33 am

طيف

أدهشني طيف
زاورني آخر الليل وفات
ساورني شك في طلعتو
في لمسة الحزن الغريبة وهيئتو
وادهشني لمن درت أديهو السلام
فتّشت في حلقي الزمان
مليان كلام
ما لقيت حروف
طلّعت أفكاري البنيتا على الورق
اتهدّمت كل الجمل
خانّي الكلام وبقيت براي

يا طيف أقيف
ما تفوت قبُل تديني خاطرك
وتحكي ليْ
لو تاه لساني وما قدر
يطلع عليك أطلع عليْ
وان سدّ جنح الليل دروب الضي عليك
أشكيهو ليْ
بوقد مشاعري عليك شموع
يا ها الزمان أديتا ليْ
ما تهون عليْ
لحظة ظلام تحجب عينيك
لو هان ظلام الكون عليْ

يا طيف أقيف
عارفني ما بحمل عليك
مرصوص ملان بالذكريات
مليان كمان
شوقاً كتير سايقني ليك

والطيف رحل من غير كلام!
زي التقول شايل ملام
لكنّي عارفوا كمان حنين
ما بيعرف اللوم والخصام
يا ربّي خانو القول
متل ما خانّي في لحظة الكلام!

حزن الفراق الباقي جوّاي
يبقى يا طيف هو العليك
ولاّ المشاعر الجيتني بيها
كانت مشاعري رأيتا فيك!
هيّجت فيني الذكريات
وشغلت زول خايف عليك

موضوع: رد: همس القوافى 10/9/2008, 3:34 am

يا بنية معاي
قنديل وشعاع
كل ما أتعب بكتب ليها
واكتب فيها
ارتاح وينزاح
هم من جواي
كلما سافر خاطري عليها
يا بنية معاي في كل خطاي
يا بت فصّلت عليها غناي
رفرف جواي
قلبي الولهان
فرحان بيها
يا بت من نور
سافرت دهور
وقطعت بحور
في عينيها
ونظمت أقول
أحلى الكلمات
جنات ورياض
ارتاح فيها
احسب ساعات
وايام وشهور
أتمنى أعود
ارجع ليها
يا بت فيها
من كل جمال
حاجات حلوات
بحلم بيها
يا بت جواي

موضوع: رد: همس القوافى 10/9/2008, 3:35 am

غربلت ليك
من صفوة القول والنضم
أجمل غناي
وسرقت ليك
خفقات حروف الكون براي
لو عارفه كيف أنا بعشقك!
لو عارفه كيف بتأملك!
لو عارفه كيف بتعشّمك!
يابت خلاص ...
اترفقي
أنا والجنون شعرة ونكون
في فد مكان
اترفقي

موضوع: رد: همس القوافى 10/9/2008, 3:36 am

فردت عليك
كتابات الشجن والنّوح
وسيل وهْجك
صِبح صاخب بلا توصال
وفيض رجْع الزمن
توّه مداراتي
شرَقت عليك
بلا لمعة ضياي
غنيت....
ولا طَلَع النغم مني
أتاريني .......
أكنت بغنّي في جواي
أخرس من حُجار قلبك
لسان قولي
وأطرش من صميم حسّك
سَمع هولي
أتاريني .......
على صفحة هشاشة الموج
كتبت غناي وأشعاري
***
ولا همّاك
أضيع في سكّة الحاضر
ولا همّاك
يزيد فيني الزمن باكر
ولا همّاك
أشيلك جوّه في الخاطر
ولا همّاك
أريدك وأبقى فيك شاعر
ولا همّاك

***

عليْ
أسلُك مدار الضيْ
أقول إمكن ألاقيها
وبيْ
حرقة نهار الصيْ
عشمان نظرة تطفيها
خلاص
كملت خطاي وإن حيْ
مصيرا العين تلاقيها

موضوع: رد: همس القوافى 10/9/2008, 3:38 am

قريبتك سر كبير فيني
قدر ما أمشي منو أفوت
يزاور الشوق
أحن ...
أرجع ...
يسيل حبر الكلام مني
ويزيد الريد ...

موضوع: رد: همس القوافى 10/9/2008, 3:39 am

سرحت معاك
طلعت من الزمن والناس
سرقت جناح عشوق ولهان
مسافر لي حبيبتو هناك
ورا القمرا
رحلت وراك
على زمناً بلا ساعات
لمحنا البهجة في الأفلاك
نظمنا كلامنا للعشاق
شرقنا على ربا البهجة
ولبسنا قشافة النّساك
سرحت معاك

***
كأنّك وانتي قاعدة معاي
بريق نجمة
وكأنّك بي خفيف روحك
مرور نسمة
وبسمع من جمال فكرك
كلام أسمى
***
تمر الدنيا عندي تفوت
تفوت أكوان
مدن وأحداث
وناس وزمان
ويفضل من عيونك لي
صدى الذكرى
***
لمحتك في نسيم فصل الربيع
لمّا الزهور خطّت بألوانا الطريق
وشفتك في تقاسيم وشّي في
زمن الجفاف والضيق
وحسيت بيك
متل ما فتّ ليك أول
بقيتي معايا في كل حال
صديق ورفيق
هناك بالحيل
عرفت نفاسة الجوهر
عرفتك زي شعاع شمسك
لا غاب يوم ولا اتحوّل
***

موضوع: رد: همس القوافى 10/9/2008, 3:40 am

يا شايلة همك مرتين

ومشيّلاني الهم معاك

مترقّبة الزمن البعيد

لامن زمن يومك نساك

ونساني برضو اليوم معاك

يا خايفة من بكره البجيك

لامن ظلام الهم غشاك

وغشاني برضو الهم معاك

تعبت رؤاك مدّ البصر

ما تريّحي الشوف من (هناك)!

وهناك رؤاك لمّن تصل

تكمل عليك بهجة رؤاك

يا زولة كبّت مويتا

شافت سراب كضّاب هناك

عطّشتي روحك مرتين

سقتينا لي سكّة هلاك

يا واقفة أبعد مني وأقرب للقليب

أنا لسّه منكوب في رجاك

موضوع: رد: همس القوافى 10/9/2008, 3:41 am

منقولة من صفوة ضميرك
بُيضة اللبن الحليب

يا الكلّما بطراها بغرق
كلّي في احساس غريب

يا الشايلة همّنا من زمان
يا ضلّي في الزمن الصعيب

في ضلمة الليل في السفر
في وحشة الدرب الكئيب

ألقاها قدّامي ووراي
تمسح تطيَّب للقليب

عكّازي في ضعفي وعماي
ودوايا عيّان ، والطبيب

يا باقية لي ضروة وملاذ
مكتوب أكون أنا ليك حبيب

مكتوب علي أنا أعشقك
واصبح معاك شاعر أديب

موضوع: رد: همس القوافى 10/9/2008, 3:41 am

قادني الزمن
ووصلت ليك
شايل كلام
رصيتو فيك
اديني فرصة أقولو ليك
سكتت مشت
سرقت عيوني ملامحا
وجنيت

موضوع: رد: همس القوافى 10/9/2008, 3:42 am

جاييك زمان الالفة
والريد والغنا
ما تفوت بعيد
لسه الأماني الحالمة تتقاطر عبير
والشوق لبس
خامة ازاهر الروض ورود
قرب بعد فرقة سنين
وارجع تعال
ما فات كتير
سامع هناك
بعد المدى
صوت التباشير
والأماني الحالمة
بي اسمك تقول
أوعك تفوت
صدقني لسه الكون جميل
راجياك هناك
كل السمات الطيبة
في الناس الحنان
شايلاك قلوب
ما يوم نست طلّة ملامحك
وعزتك
شايلاكا زول
زي طلّة القمرا وضياها وبهجتا
سامق متل قامة النخيل
ارجع ..
وراك ناساً يبيعو الكون عشانك ....
ما تفوت

موضوع: رد: همس القوافى 10/9/2008, 3:43 am

شايف ملامح الدنيا فيك
بسمة براءتك وطلعتك
دهشة عيونك ونظرتك
عشقك غنايا وضحكتي
وحجا الكبار أحكيهو ليك

وشايفني زول
صاحب دريبات الرحيل
خلاّكي فات
شان يوم يجيك
مليان حكاوي يقولها ليك
سافر عشانك وارتحل
وقبل الرحيل
يتمنى يرجع تاني ليك

موضوع: رد: همس القوافى 10/9/2008, 3:44 am

كأنّك وانتي قاعدة معاي
بريق نجمة
وكأنّك بي خفيف روحك
مرور نسمة
وبسمع من جمال فكرك
كلام أسمى
***
تمر الدنيا عندي تفوت
تفوت أكوان
مدن وأحداث
وناس وزمان
ويفضل من عيونك لي
صدى الذكرى
*****

موضوع: رد: همس القوافى 10/9/2008, 3:45 am

طارد غناي أنا من زمن
لكن يعود يجبرني فيك
عشرق سطورك يا ورق
كتر الكلام الكاتبو فيك
كمّلت عمرك يا قلم
ولا عمرو غاض عمر القصيد
***
باكيك بعد زمن الفراق ..
توّهني عنِّّك وما رجع ...
فجر الصفا وألق المغيب
باكيك بعد غربة وشقا
ضاع الوفا ..
ما بين غيابك والطريق...
عسرة دروب الدنيا ليك
فتناها بالضنك الشديد
لا سامرت عيني عيونك يا مناي
لا حزّ فيك وتر القصيد
وأنا زول طفر من قلبو ريدك ..
وما نطق بالريد
سكت لمّن نطق حرف القصيد
وأنا زول مرق منّك عشان يمسح
دميعات الشقا
لكنو كان بدّل دميعات الشقا
وأداك دميعات الرحيل
انا زول خلاص...
توّه مسارب الضي عليك
اديهو خاطرك مرتين
لمّن رحل منّك عشان يمسح دموعك
ومرّة لمّن جاك حزين

موضوع: رد: همس القوافى 10/9/2008, 3:45 am

مراسيل

مراسيل العيون بالشوق
بدورا تطفِّي نار الريد
ملت فاضي القليب لافوق
غريب أمر الغرام والريد
سريت بالروح ....
سِفِل همس الكلام مرّة
سَربت براي ....
أخاف يقبضني حارس الريد
سكتَّ .... ولا نضم حسّي
دخلت ..... ولا لمح ضلّي
لقيت محبوبي ما شافني
سرقت ملامحو دون يعرف
شربت برايا حالي الشوف
وقلت خلاص رويت أمرق
مرقت وجفّ حلق الجوف
أخير أوّل ...
ملاني الخوف
سحبت الروح ...
سِفِل همس الكلام والبوح
أخاف يقبضني حارس الريد
بعد ما خانّي حدّ الشوف
ولا طفّيتو جمر الجوف
ولا حارس الغرام فاتني
أريت محبوبي مرّة يطوف
يشوف نار الغرام البي ... ويواسيني

موضوع: رد: همس القوافى 10/9/2008, 3:46 am

شابيت ..
مجهجه بين قصور الايد
ورغبة خاطري فيك
ولا انتي طالك مني شيئ
ولا قادرة تفصحي بالعليك
العارفو من زمن انتظاري...
على شبابيك العشق
مجنونة بيك عيني ..
وهايمات فوق بحور عينيك
والعارفو منك....
لسه ناسج في الضمير
بعد السكات لجّم دريبات الحديث ..
وراني صمتك كل شيئ
ودخلت جواك ...
قلت ممكن تعرفي
لاقاني فيك سراً قديم ...
كان مصطفيني .... ومصطفيْ
وابحرت في عالم جديد ...
غاص في وجودك .. وغصت فيه
وأنا لسّة مانعاني الدروب
اتوسّلت كل الجوارح الفيني ...
ما باقيلي شيئ
وبكيت ... متل مطر الخريف
لا حرّكت عيني مسار دربك ..
ولا بي محتفي!
وطاردني منّك كل شيئ

وأنا لسه بتحايل عليك ..
واتشابى ليك
واقف على نَفَس الأمل
تعبان .. وصابر .. ومشتهيك
والشوق لهيب ...
شلهب ضفاير الانتظار
وأنا بُعدي عنّك ما الحصار..
ما دمتي ساكنة....
على مشارف الروح حضور
مرصوصة في جوايا انتي مرتّبة
صافيات ملامح الطيبة فيك ... ما أعذبا
وأنا برضي لسع مشتهيك
شابيت ...
مجهجه بين حضورك وغيبتك

موضوع: رد: همس القوافى 10/9/2008, 3:47 am

العتمة خرّابة بيوت

اسقيها من ضيّك جهر

أكويها بي صدقك تفوت

وفّر مصابيحك ضهر

و الضلمة ما ضلمة مسا

الضلمة في جوف البشر

ألزم جمر نار الصبر

نور جوانب العتمة فيك

الدنيا بيّاعة ودنيئة ومعتمة

رغم المصابيح والشمس

و أيامنا كلّها زي بعض

من بكرة يومنا ومن أمس

والناس من الطين كلّهم

ديما النفس ياها النفس

عميانة لو ما قدّتها

شبعانة لو جوّعتها

مرتاحة لو اتعبتها

ما النفس زي طبع الطفل

غبيانة مطموسة فكر

أسقيها من صافي المشاعر تنعدل

ضويها من نور الحقيقة .. وروّضا

أنزل بعد ضل النجوم ما ينحسر

شابه تسابيح القمر

الضل خراب متل الضلام

ملعون ... منافق ... مستبد

والضلمة مكروهْةَ الضياء

والحكمة مصباح القلب

مصبوبة من عالي السماء

مقسومة زي رزق البشر

والعتمة خرّابة بيوت

أكويها من نار الصبر

أرويها من نورك ... تموت

الضل مع الضو بنحسر

موضوع: رد: همس القوافى 10/9/2008, 3:48 am

فرقك من الواطه النعال الدستها

وأنا فرقي من وجعك شبر

يا راضية بالعرق البخر عز الضهر

ما ضقتي راحة البال ... ولا ناموا الجهال

الواطه مدّ الطين ...... عذاب

والسحابات البصبّن

زي عرق راسك خراب

لا قوّمن تيراب شقاك

لا طوّعن قاسي التراب

وأنا منّك انتي .......

من القديمات المشقّقة ...

والهديمات الملتقّة ......

واللقيمات المجهجهه....

في الإديات الرقاق...!

أنا من ضفاف روحك ....

قناعة واغتباط

رغم العدم ....

والضيق ......

وعسر الحال عليك...

رغم الشقا ....

ما طال أساك

شديتي نصّك ....

ومن سفل قدميكِ ... لا شامخ علاك

معطونة في الطين والتراب....

ما قلتي آه من التعب ...

لا أفّ خشمك ..... لا نطق كلمة عتاب

سامع غناك .. جوّاك مرتّب بالنضال

منضومة عزّة نفسي فيك

محمومة بالعزّ والجلال

خليك مع الطين والشقا

ما دمتي في شامخ علاك

موضوع: رد: همس القوافى 10/9/2008, 3:49 am

أغراني من صمتك
ضجيج الهيبة فيك
وسكتَّ ..... ما بعدك كلام
فتشت لي سكة دخول
مدخل وصول
أحرف قبول
جملة سلام !
فارقت فيك روحي وغناي
وبقيت بعيد
أبعد من الزمن القديم

صمتك معاني الدهشة،
أبلغ من كلامك
اخترت أسكت وأنتظر
أحرف ملامك
وشهقت لمن جاني في
خجلك هيامك
من غير نفاق
من غير لسان
سمّعني قولك
يا غيمة ما طال
انتظارنا على هطولك
وما نكث خانك رسولك
وما طمح عندك غرورك
شفت في عينيك سرورك
بعدما أدهشني صمتك
وقول عيونك

موضوع: رد: همس القوافى 10/9/2008, 3:49 am

الشوق برك قدام بيوت الاغتراب
ولول لمن حسّو اتقرش ..
ولا زول نفض عنّو التراب
الضاقو من وجع البلد
في الطين أسى وغربة وعذاب
والشافو من سوس البلد
عطّش مسامات السراب
العودة ماتت في النفوس
نبتت قوادم الاغتراب
وأنا لسه بتوجّع عليك
ببكي الفراق والارتحال
باصرت حتّة تشيلني فيك
شديت رحالي وحالي حال
وبكيت من الوجع العليك
زي سيل دموعك دمعي سال
ومشيت وفي الخاطر أجيك
ألقاك منى وهيبة وجلال
وأنا لسّه مستنيك تقوم
مهما انتظاري وصبري طال
وأنا لسّه عشمان فيكا خير
انهض متل شامخ الجبال
أنهض ... ترانا بنشبهك
انهض ... برانا بنشبهك
يا نموت عديل عزّة وشموخ
يا تعلو راية الانتصار

موضوع: رد: همس القوافى 10/9/2008, 3:50 am

اسكن شبح الغربة الغادر
الظلم هضيم ملعون فاتر
والليل غربال الضو... شاطر
والسر البينك وبين الضل
مكبوب في أعلى مكان ظاهر
والوجع الاتعب طاقيتك
قادر .. قادر
و كتفك ملموم
لا خط لا نجوم
مطموس معدوم
حقك مهضوم
جلدك محموم
قلبك فاتر
مجبور تنهد
لا حق لا عد
ولا حد شايفك
ولا عارفك حد
ولا عندك طين
لا حق لا حد
حايم صايم
دايماً نايم
والناس بتخم
ولا عارفنّك ..
ولا حاسبنّك ..
ولا حاسنّك ..
ولا شايفنّك ..
انّك نايم ...
غايب ...
تترمرم في البلدان
الما هيلك ..
وهيلك يا زول ..
أكلوا الدودو ..
اكلوا التمساح ..
الأهلوا نصاح ...
وانت النايم ..
لا طين لا حد
ولا عادك حد ..
غايب نايم ..
مسكين يا زول ..

موضوع: رد: همس القوافى 20/9/2008, 7:00 pm

قـولـة أهـلاً

يا غيمات في الدنيا انشرت
يا خطوات الفرح الجافي
يا مجلية بنور العفة
ويا مكسية سماحاً مافي
هلت فوقنا بشائر منك
ختت غنوة ولحناً دافي
كلمة تكون في طول نخلاتك
أهلاً مرحب بيك وعوافي
كلمة بسيطة فريع وسبيطة
محنة وهيطة وبلسم شافي
حتحت شوقك حس قمرية
وشالت شوفك حلمة غافي
يا منسية في كشفة حالك
يا مستورة وحالك خافي
قولة أهلاً ياها المقصد
بقة نورك يوم تنشافي
إنت الزمن الكاسك جابك
دودر بينا فيافي فيافي
وإنت الزمن الكاسك جابك
يكتح رملو سوافي سوافي
يا مطوية في قولة أهلاً
أركزي أثبتي أوعي تخافي
بكرة بمد فرحك ضرعاتو
وبكرة النيل حايرجع وافي

موضوع: رد: همس القوافى 20/9/2008, 7:02 pm

من ويـن معاك

من وين معاك يبدا الكلام
يا نور رحل...
خلّف مع الحسرات ضلام
يا انتظار خطوة أمل... يا انتصار
يا ليل ممدد
في شوارعنا النشف ريقا
وبكت بعدك سلام

كل النجوم نايحات تشيل
دمعات وجوم رافضات تسيل
ومشى المطر
مشوار دموع
ودع أراضينا اليباب
أنغام رباب...
أنانة ... حزنانة... وتموت
في حلوقا أفراح الوصول
ترحل تفوت
بعدك هجر عشو الوطن
عصفور يدغدغ
عمرو باللوعة الحزن
يا انتحار قمراً طلع
قبال زمن
يوم خاصم السما والغمام

من وين معاك
يا حرقة الأسى والأسف
يبدا الكلام
من وين معاك يبدا الغنا
وتبدا الحروف تحرق تواريخا القدام
الكان مسجلة في الأفق
من وين معاك يبدا القلم
ويكتب رحيل زمن الصدام
يا صرخة القرى والحقول
يا وجعة الموج والفصول
يا همسة الرحلة الأليمة
وقول قديم مزروع شتول
ترحل معاك ضحكة ضفاف
فرحانة بي
موجاً غلب مدو النشاف
من وين معاك
ترجع خطاوي الليل سكون
وتغيّب البهجة الألم والإرتجاف

موضوع: رد: همس القوافى 20/9/2008, 7:04 pm

بتمـناك

بتمناك
يا مطراً زارنا
وصحّى موات الأرض البور
بتمناك
والهمس المطوي يدافر
جوة حناجر
شايلة صراخ أطفال مبتور
بتمناك
أنا قلبي النازف
كان بتحدى رحيل الغيم
عن ريداً فيهو النيل
زي أحلى عروس يتراقص
ومن أعماقو يطل النور
أغصان النخلة النايمة
تزور أحضان الجرف الباكي
تعدد في تاريخا الماضي
وعمق الحاضر... وفرحاً جاي
النيل بتباشر بالقمرية
وضل النخلة...
وكلمة عاشق...
بنسج ريدو غنا ودوباي
بتمناك
والقول ممدود أنغام وتحية
بتمناك
بيناتنا سدود...
بيناتنا حدود وسنين ضوئية
دمعة راحل فارق شمسو
وودع آخر نغمة ناي
القمر احتار
في الضلمة الجرفت
مد الحلم اليافع
وحس دلوكة تبشر بالأفراح
القمر النيل...
القمر العرب الرحل
أدى الناس أنوار ساحاتو
وراضي يفجر من واحاتو
وميض البشرى وطعم الكسرة
وحس طنبور
لا شمساً تحزن
لا عصفور يهجر أوكارو
تغني الدنيا ...
تغني النخلة وضل النخلة
وحلم النيل يتخطى السور
بتمناك
يا شغف الوادي...
وشرف أجدادي...
وخالد باقي دهور ودهور
بتمناك
يا مطراً زارنا
وصحى موات الأرض البور

موضوع: رد: همس القوافى 20/9/2008, 7:36 pm

ربـك لطـف

ربك لطف
لاقاني بيك
في واحدة من أحلى الصدف
رجعني للفرح الزمان
أصلو الفرح طعمو اختلف

ومشيت بعيد
لامن لقيت سري انكشف
وغرامي ليك
الكنت داسيهو انعرف
احترت وين ألقاك... وكيف
في الريدة اتحاشى الكلف
إلا بس ربك لطف
لاقاني بيك
في واحدة من أحلى الصدف

قبال تجيبني الصدفة ليك
أنا كنت ماليني الأسف
وكتين حرق جوفي النويح
وكتين قمر ريدي انكسف
وأنا كنت في حيرة وظنون
ومعاها كم جرحاً نزف
إلا بس ربك لطف
لاقاني بيك
في واحدة من أحلى الصدف
رجعني للفرح الزمان
أصلو الفرح طعمو

موضوع: رد: همس القوافى 20/9/2008, 7:37 pm

ها مهبوشة
ترازي تزازي في ها دي الفنقة
ها مربوشة
تشري الغيم وتفوتي
تزرعي لينا غنيوة ريدك
شدرة منقة
ما ظنيتك هشتي ودشتي
وشلتي كلامك
بيهو ضربت الكلمة الجاتك
وكت الزنقة
تبدا تقرقر منك ضحكة
تقرقر بطن الواطة
وتمرق شدرة
تخلي الحال الواقف يقعد
خطوة وخطوة
يعود الحنّ وأنّ وغنى
حبيبة قلبو تشيلا الموجة
وعشم العاشق
عشم إبليس الداير الجنة
ها مهبوشة
مكان ما فتنا ووين ما كنا
ما لاقانا ولا صادفنا
دغشاً بحرق زي نار دغشك
سجم الخلا حريقو وفاتك
يوم الحبل الرابط حلّ
يوم ما جونا أولاد الحلة
عديل في وجهة درب الغيمة
عديل ضُلالة ونجمة وخيمة
وكنت براك في وسط الشلة
وكت صنقرتي
الجبل الواقف صنقر
كان يتلفت
عاين ودنقر
حت ما عاين
ما لاقالو وشيشاً غيرك
يشيلو ويقيلو...ويلولي مقيلو
ويقطع وش المطر الأسود
يقطع وش المطر الأسود!!
كان المطر الأسود حوّد
كان الفجر الناير دردق
بي قدامو الليل الهوّد
كان آ بنية عديلك عوّد
كان زغرودة خيرك دوّت
ها مهبوشة
ها تريانة تدفي عشوشا
ها فردوس بالخير مفروشة
مال الزمن الجاير غمتك
كسّر فيك جنحات الطلقة وعمتك
ها دفاية المات بالقرة
فرهدي حلماً يوصل بكرة
يراشي الناس الفقدوا البسمة
وطيبة الروح في حلو الكلمة
يا ستار من ها دي القسمة
يا مرسال الشفقة تهوّن
كلمة شفقة تشبّع جايع
ياتو كلام الشبع جايع
ياتو كلام الصلب أولادك
فوق خشبات العشم الضايع
كنا نشيلو سكاتك حكمة
كنا نشيلو سكاتك حلمة
يا ستار من ها دي القسمة
محناً شتى
تحاصر صيف الريد الشت
ها مهبوشة
زمنك غلبك حلبك
ضرعاً يشبع يرتع يمتع
ودايماً يجود
صبحك شدّ رحالو وبعّد
أريتو يعود
يقشقش ليك الدمع الهتف
ويفتح ليك كم باب مسدود
شان ما تلهلب تاني الضحكة
ونار الفرح البقى هبود
ها مهبوشة

موضوع: رد: همس القوافى 20/9/2008, 7:38 pm

بجيـلك

بجيلك
من هدير الموج
ومن سكة مشي الضفة
ومن درب النزيف أسكب
غناوي أنيقة ملتفة
بجيلك
لما صمت الليل
يفوت حدو ويزيد لهفة
ولما الوردة
تلبس من حروفك توب
ومن مرض الغرام تشفى
محل ما شوقي يبكي عليك
ووين ما الدهشة تصطف
بجيلك زي شعاع النور
وزي برق المحبة العاش
يداري مجيهو بالصدفة
بجيلك قيف بحر زعلان
تغسّلو دمعة من عاشق
حبيبتو اتغابت العرفة
وقلبو النازف المجروح
بترسم عفتو العفة
تدور الدنيا زي ما تدور
وأقيف عندك
قصيدة خجولة لما تشوف
صفاك تصفى
عليك ذات الحقيقة سؤال
شنو الخلاك
تباري سحابة مجنونة
وبدون كلفة
تقيفي تعايني لي قمراً
سرق أنوارو من وشك
وشيّد همسو ليك غرفة

موضوع: رد: همس القوافى 20/9/2008, 7:39 pm

صمت الكلام

منو البقدر يشيل صمتي
ويعبّر عنو بالأحرف
ويدونو في شعاع الشمس
بالكلمات
منو البقدر يكون أحلام
وياخد من دموع عيني
ويغسل أسايا بالبسمات
متين يا ليل...
صباح الريد يطل
في دنيا أيامي
تبارح لهفة الأحزان
تبلل شوق قلب ظامي
متين يا قمري إنت تهل
وتطوي ستائر الإظلام
وتبعد سطوة الأوهام
ويسيل المد...
يهد سد الحواجز هد
تعال يا ضو
تعال يا أملي في الماضي
تعال يا رمز حلم الغد
تعال يا رقة الأنفاس
وخت البشرى في الإحساس
وزح السد
عشان ما تزغرد الآهات
عشان ما تكتر البسمات
وتمتد في المدى وتمتد
تجينا البهجة تتشابك
تهاجر في المقل أفراح
وتنزاح الهموم تنهد
ونرجع تاني للأحباب
نهدّي النبض والأعصاب
ونزرع تاني جنب الباب
شجيرات الوئام والود

موضوع: رد: همس القوافى 20/9/2008, 7:40 pm

بهواك
قدر ما تمدي إيديك للشمس
عفواً تمد ـ ريدة ـ الشمس
إيديها ليك
وأهواك
مداين من جمال
تدهش عصافيري وأطير
أحلم أرك ما بين عينيك
يا بت بحيرة وطرف ناعس
وقوس قزح
يا بت حديقة بتغرس
الريد في الضفاف
تهديني أكوان من مرح
عيد من فرح
زغرودة لي يوم الزفاف
بهواكي بي لون مختلف
ما شفت قبلك اختلاف
أديني رقراق من ولف
أديك عوالم ائتلاف
يا بهجة يا نور يا عفاف
يا همسة لامست الشغاف
يا موجة تتحدّى الجفاف
يا ضحكة بتهدّي الفؤاد
تقفل شبابيك العناد
تفتح مداين اعتماد
وكتين تطل تظهر
سعاد
والغيمة بتناجي الشمس
تفرد ضفايرا في البلاد
وأنا من أمس
من موكب التاريخ بحس
بيكي وأسافر في عيونك
وما بدس
ريدي وأبوح
يا غالية بي كل الكلام
بهواك
قدر ما تردي يا بت السلام
تدي الصباحات ابتسام
تنسجمي حد الإنسجام
ما بين تضاريس الحروف
الناقشة اسمك في الفؤاد
بيناتنا بس يفضل ميعاد
وكلام نقولو وما معاد
تنزل سحايب ريدنا غيث
تنده نجيماتنا البعاد
تنشر قصائد في سعاد
تنثر قصائد لي سعاد
تثمر قصائد يا سعاد
وأهواكي
يا بلبل بغني ومنشرح
يا عندليب زمني السمح
يا باقية لي إنت الحياة
يفصلني عنك إلا موت
يا رايعة يا كل البيوت
يا فارهة يا نور البيوت
ما طالما الليل ارتحل
حايبني وين العنكبوت؟
ما طالما الخوف ارتحل
حايبني ايه العنكبوت؟
وأهواك
قدر ما تمدي ايديك للشمس
عفواً... تمد ريدا الشمس
أنغام وصوت

موضوع: رد: همس القوافى 20/9/2008, 7:42 pm

وين ألاقيك

وين ألاقيك...
يا المسافر في عيوني
وصرت لي قلبي الشريك
يا الموهّط في الدواخل
منتظر لحظة مجيك
داير أضمك بي رحابة
ومن هجير الحر أضاريك
فجري بشرق من عيونك
تبسم اللحظة وأباريك
السما بتهديك نجوما
وتعزف القمرة المزازيك
والبنيات في الحواري
ليكا بتدق الدلاليك
وين أراضيك؟
الورود عنك بتسأل
وديمة تحلم لو تلاقيك
والضفاف في النيل بتزعل
إلا لو دايماً تماسيك
يبلع الموج ريقو مرة
ويجرف الساس والمداميك
والقصائد في الدفاتر
جوة في بطن الدفاتر
تستعيد أيامنا ديك
وين ألاقيك
حس غنيواتي الحزينة
انبحّ من كتر الكواريك
فيني شوقك كم تجدد
هل تجدد شوقي فيك؟
فيني شوقك كم تدفق
خش بالباب والشبابيك
حلمي دايماً إنت ترجع
موعدك يصبح وشيك
وين ألاقيك
وإنت ناسي الناس أتاريك
وين ألاقيك؟

موضوع: رد: همس القوافى 20/9/2008, 7:43 pm

يا طالعة مني…
وداخلة في جوف السحابة
زارعة في نبضي المحنة
وشاتلة في دربي الصبابة
طمني الناس البتبكي
وفرحي الفقرا الغلابة
المطر يوم بكرة بنزل
يروي واطاتنا ويبابا
بكرة بتغني العنادل
وتحتفل بي ضي شبابا
بكرة راح الفرحة ترجع
بعد ما كانت بتابا

يا طالعة مني...
وداخلة في جوف السحابة
طالعة مني وساكنة جوّاي
من سنين بعرف حسابا
من زمن ما القمرة فاتت
وكنت بسأ ل عن غيابا
بين رموش النجمة شفتك
غنوة بتزيل الكآبة
تبهج المحروم معذب
تهدي للمعول صلابة
تهدي كل طورية وردة
وتدي كل عصفورة غابة